មន្ទីរកិច្ចការនារីខេត្តកំពត៖
លោកស្រី សឿន សារី ប្រធានមន្ទីរកិច្ចការនារីខេត្ត និងមន្រ្តីរាជការ នៃមន្ទីរកិច្ចការនារីខេត្តកំពត បានរៀបចំ ពិធីចែកអំណោយដល់គ្រួសារស្ត្រីងាយរងគ្រោះ និងផ្សព្វផ្សាយពីវិធីកាត់បន្ថយហានិភ័យពីការឆ្លងជំងឺកូវីដ ១៩ នៅឃុំទូកមាសខាងលិច និងឃុំទូកមាសខាងកើត ស្រុកបន្ទាយមាស ខេត្តកំពត ។ ឯកឧត្តម ជឹង ផល្លា ប្រធានក្រុមប្រឹក្សាខេត្ត ជាប្រធានគណៈអធិបតី និងមានអ្នកចូលរួមពីសំណាក់ ឯកឧត្តមលោកជំទាវ សមាជិកក្រុមប្រឹក្សាខេត្ត ឯកឧត្តមប្រធានក្រុមការងារយុវជនខេត្ត ឯកឧត្តមប្រធាន ស.ស.យ.ក ក្រុមការងារចុះមូលដ្ឋានស្រុកបន្ទាយមាស លោក លោកស្រី អភិបាលរងស្រុក មន្ត្រីរដ្ឋបាលស្រុកបន្ទាយមាស និងអាជ្ញាធរក្នុងមូលដ្ឋាន។
អំណោយដ៏ថ្លៃថ្លារបស់រាជរដ្ឋាភិបាលកម្ពុជាតាមរយ:មន្ទីរកិច្ចការនារីខេត្ត ដែលចែកជូនប្រជាពលរដ្ឋដែលកំពុងខ្វះខាត។ ក្នុងមួយគ្រួសារ ទទួលបានអង្ករ២៥គីឡូក្រាម មី១កេះ ត្រីខ១យួរ ប៊ីចេង១កញ្ចប់ ទឹកត្រី១ដប(២លីត្រ) សាប៊ូម្សៅ១កញ្ចប់ ស្ករស១គីឡូក្រាម សាប៊ូលាងដៃ១ដុំ និងថវិកា ២០,០០០៛ ក្នុងនោះដែរឧបត្ថម្ភកងកំលាំង ១០នាក់ ក្នុងម្នាក់ទទួលបានថវិកា ២០,០០០៛។
ឆ្លៀតក្នុងពេលនោះដែរ ឯកឧត្តម ប្រធានក្រុមប្រឹក្សាខេត្ត និងលោកស្រីប្រធានមន្ទីរកិច្ចការនារីខេត្ត បានយកទេយ្យទាន គ្រឿងឧបភោគ បរិភោគ និងបច្ច័យ ប្រគេនដល់ព្រះសង្ឃដែលគង់ចាំព្រះវស្សា នៅវត្តអង្គចំប៉ី រួមមាន÷ អង្ករ ៥០គីឡូ មី ២កេះ ភេសជ្ជៈ ២កេះ និងថវិកា ១០០,០០០៛ ព្រមទាំងបានជូនបច័្ចយដល់ យាយជី តាជី ចំនួន ៣៥នាក់ ម្នាក់ៗ ១០,០០០៛ ។
ថ្ងៃអង្គារ ០៨កើត ខែ ស្រាពណ៍ ឆ្នាំជូត ទោស័ក ពុទ្ធសករាជ ២៥៦៤ ត្រូវនឹងថ្ងៃទី២៨ ខែកក្កដា ឆ្នាំ២០២០ ។
