មន្ទីកិច្ចការនារីខេត្តកណ្តាល៖
ព្រឹកថ្ងៃទី២ ខែមិថុនា ឆ្នាំ២០២០ លោកស្រី ជុំ ស៊ីណាត ព្រមទាំង មន្ទីរ ជុំវិញខេត្ត និងអជ្ញាធរក្រុងតាខ្មៅ បានអមដំណើរលោកជំទាវ ហ៊ុន កុសនី អភិបាលរងខេត្តកណ្តាល ដើម្បីប្រគល់ម៉ាស និងសាប៊ូ ដែលជាអំណោយដ៏ថ្លៃថ្លា របស់សម្តេចតេជោ និងសម្តេចកិត្តិព្រឹទ្ធបណ្ឌិត តាមរយៈ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងាររាជរដ្ឋាភិបាលចុះជួយមូលដ្ឋានខេត្តកណ្តាល ។
អំណោយទាំងនេះនឹងចែកជូនដល់កម្មករ កម្មការិនី ចំនួន ២៥០នាក់ ដែលកំពុងបម្រើការងារក្នុងរោងចក្រកាត់ដេរ សម្លៀកបំពាក់ ក្រុមហ៊ុន Gawon Apparel CO.,LTD ដែលស្ថិតក្នុងភូមិព្រែកសំរោង សង្កាត់តាខ្មៅ ក្រុងតាខ្មៅ។ ក្នុងម្នាក់ៗ ទទួលបាន សាប៊ូ១ដុំ និងម៉ាសចំនួន២ (ជាប្រភេទម៉ាស់ដែលអាចបោកទឹកប្រើប្រាស់ឡើងវិញបាន) ។
លោកជំទាវបានលើកឡើងពីវិធីសាស្ត្រក្នុងបង្ការ និងទប់ស្កាត់ និងវិធីការពារខ្លួនកុំឲ្យឆ្លងរោគ កូវីដ-១៩ តាមការណែនាំរបស់ក្រសួងសុខាភិបាល។ យើងទាំងអស់គ្នា ត្រូវតែលាងដៃ ឱ្យបានញឹកញាប់ជាមួយសាប៊ូ ជែលលាងដៃ ឬទឹកអាកុលជាដើម ហើយត្រូវពាក់ម៉ាសជានិច្ច ដើម្បីរក្សាសុខភាពឱ្យបានល្អ។ បើក្នុងករណីមិនស្រួលខ្លួន ឬមានការសង្ស័យ ថាបានឆ្លងជំងឺកូវីដ-១៩ សូមទាក់ទងទៅ អាជ្ញាធរ ឬមន្ទីពេទ្យបង្អែកដែលនៅជិត ដើម្បីទទួលបានការធ្វើតេស្ត ពិនិត្យសុខភាព និងព្យាបាលបានទាន់ពេលវេលា។
